Cagayan de Oro City: Lola Sitas Burial & SideTrip

Hulyo 05 hangtod Hulyo 08 naa mi sa Cagayan de Oro City. Sakay sa bongo na gidrayban ni tatay Noel.

***

Hulyo 05, 2019 (Biyernes)

Uban namo sa sakyanan sina Lola Lucy, Ante Marissa, Angkol Boy Bactol ug iyang anak na si Ric ric ug iyang asawa ug anak, Angkol Tining, si Lyka ug Mama. Sayo pa sa buntag bandang alas 4 sa kadlawon nilarga na mi.

Nihapit pa mi sa balay ni Tatay Noel. Niagi sa dalan paingon Digos City, padulong Kidapawan, lahus North Cotabato paingon Bukidnon.

Pag-abot namo sa Kabacan didto mi namahaw.

Nidiritso na sad mi, lapad kaayo kalsada sa probinsya sa Bukidnon. Giagian na mo ang mga municipsyo og lungsod sa Bukidnon. Giagian na mo ang Valencia ug Malaybalay, mga progresibo na lungsod sa Bukidnon.

Sadya ang byahe, nikalit ug bundak ang ulan. Pag-abot namo sa Malaybalay nakahinumdom mig pani-udto ni agi mi sa usa ka restaurant na naga serve ug Tuna pero nidiritso na lang mi ug wala nag dugay didto kay dugay ang pagluto sa isda.

Pag-abot namo sa usa ka tindahan sa sud-an didto na mi nikaon. Nabusog jud mi.

Nilarga na sad ang bongo, naabot na mi sa Manolo Fortich ug nibundak nasad ang ulan.

Bandang alas 4 naabot na mi sa Cagayan de Oro City, niagi mi sa Puerto usa ka barangay sa CDO. Perting daghanag sakyanan. Ang balay nila Ante Lorna kay naa sa Bugo, naa sa pina katumoy na bahin sa subdivision ilang balay. Nasaag mi.

Pag-abot na mo sa balay ni Ante Lorna, giabi-abi mi nila, gi agda mig kape ug tinapay. Nakit-an nako ang lungon ni Lola Sitas ug nitun-aw ko. Padayon sa imong pag panaw Lola Sitas.

Alas 6 na ug nangaon mi ug panihapon. Pero tungod bug-at pa ang paninaw sa akong tiyan gamay lang ang akong kaon. Alas 8 nag start na ang pangadye. Pagkahuman sa pangadye na tulog na ko sa bongo.

***

Hulyo 06, 2019 (Sabado)

Sayo mi nang mata para sa Harana ni Lola Lucy. Grabe ang pagkanta ni Angkol Daniel. Bisan nakahaya si Lola Sitas ug naa sa kaguol, nadayon gihapon ang pagharana kay Lola Lucy. Si Lola Lucy ang kamanghurang igsoon ni Lola Sitas na igsoon sa akong Lolo Pater.

Nangape mi.

Pagkabuntag na banda alas 8 naabot sina Tita Rosing ug Tito Bert gikan Manila. Nikaon mi ug panihapon. Naabot sad sina Tatay Gil, Ante Sali, Honey, Vice ug Mimi ug si SK.

Pagka-alas dos naglarga mi padulong sa Divine Mercy Shrine sa El Salvador. Nisakay gihapon mi sa bongo ug ang uban sa kotse ni tatay Gil. Niagi sa downtown Cagayan de oro. Sa tunga-tunga sa byahe ni bundak ang makusog na ulan. Paspas kaayo ang pagplastar sa trapal. Nangabasa mi pag-ayo.

Naabot mi sa Shrine bandang alas 4 sa hapon. Pag-abot didto nanghiram ug palda ang mga babaye ug namalit ug kandila. Nagpahiram sad ug payong ang shrine. Nisaka mi, niagi mi sa mga gwardiya. Paabot sa taas nag sindi mi ug kandila sa butangag mga kandila. Nakaapil pa mig misa sa shrine. Nindot kaayo ilang simbahan. Ingles ang lengguwahe sa ilang misa kay foreigner man ang pari. Hilom ug solemne ang misa.

Ang estruktura sa simbahan sama sa korona nga tunok ni Kristo. Atubangan sa simbahan kay ang hataas kaayong rebulto sa Divine Mercy. Apan tungod sa hakusog na ulan, gidili ang pagsaka sa sacred heart nga bahin sa rebulto kay i-slayd man.

Nagnaog mi sa ilalom nga banda sa shrine. Nagpicture-picture mi didto. Dili mabayran ang kalipay. Pero gisita mi sa gwardiya kay wala mi na miminaw na dili magsaka sa hagdanan kay i-slayd. Nagpadayon ang among picture picture sa sulod sa shrine compound.

Daghan sad nag-adto sa shrine. Nindot kaayo ang palibot sa sulod sa shrine. Pero tungod kay hantod alas 6 lang kutod ang bukas sa shrine, niuli na mi. Pag-uli na namo, dili naman hinoon mu-andar ang makina sa bongo, napugos mig tulak sa sakyanan hangtod sa ubos. Dili mabayran ang kakapoy. Si Tito bert lang diay ang makapa andar.

Nibyahe na mi. Pag-abot namo sa downtown nihunong na sad ang makina sa bongo ug hapit mabanggaan sa among likod ang nagsunod sa amoa.

Ninaog mi ug gitulak ang sakyanan sa babaw sa flyover sa Cagayan de oro city duol sa Centrio Ayala mall. Nag cause mig traffic sa CDO. Ngitngit na ug naabot mi sa balay ni Ante Lorma, nangaon ug nag hulat para sa pangadye.

***

Hulyo 07, 2019 (Dominggo)

Niuban ko kina Ante Lorna para mupalit ug baboy didto sa Puerto. Uban nako si Tatay Noel ug Kuya Gaga na anak ni Tatay Tining. Gipili nila ang baboy na 60 kilos ang timbang. Didto na gikatay ang baboy. Usa ra ka tawo ang nipatay ug naglimpyo sa baboy.

Pagkahuman gisulod sa sako ang baboy. Giarsa namo ang baboy paingon sa bongo. Bug-at ang baboy maong gitunga sa kaduha. Gitagaan mi ni Tatay Noel ug pangpalit ug mainom na softdrinks.

Pagkahuman niadto mi sa Gaisano Puerto. Giparking ni Tatay Noel ang bongo sa likod na banda sa Mall. Nisulod ming duha ug gipangita sina Ante Lorna sa sulod sa mall. Natalang mi ug dugay namo sila nakita. Paadto na sila sa cashier ug palinya na. 

Nagpalit silag siopao ug nanga-uli mi.

Pagkahapon na bandang ala-una sa hapon, sakay sa bongo, uban sina mama, lyka, ante rosing, lola lucy, ante marissa, angkol ali ug iyang asawa, si tito bert ang nag-drive sa bonggo nag adto mi sa Cagayan de oro downtown ug nibisita mi sa Cagayan de oro cathedral. Naa mi sa likod ni lyka bisan init nabusog ang akong mga mata sa palibot sa dalan.

Pag-abot didto nangita silang kaihian. Niadto mi sa likod sa simbahan. Daghan tawo sa simbahan kay Dominggo man kadto.

Nisimba kami.

Pagkahuman ug simba namalit silag mga bulak. Niadto sad ako sa dagkutanag kandila.

Nisuroy sad kami sa ilang Plaza, naay maanindot nga fountain sa ilang plaza. Bibo kaayo ang palibot. Daghag tawo ang nagasuroy. Picture picture sad kami didto. Nagpapicture ko sa ilang museo na naa ra sa kilid sa simbahan.

Paghuman namauli na kami. Naagian namo ang Xavier University-Ateneo de Cagayan de  Oro. Ug naagian sad namo ang mga dagkong mall sa lungsod.

Pag-abot namo nagpahuway kami. 

Busy na kaayo ang mga tawo sa pag-tadtad sa baboy. Naga-aso.

Hulyo 08, 2019 (Lunes)

Lunes na ug karon na ihatod sa lubnganan si Lola Sitas. Bandang alas 9 sa buntag niadto na kami sa simbahan. Nisakay mi sa bonggo. Ang uban kay sa mini-bus, samtang ang uban nag motorsiklo lamang.

Gamay ray nangumpanyar.

Naay kadungan  sa misa si Lola Sitas na usa ka Reservist sa navy.

Iskrikto ang pari nag misa sa patay. Daghan siyag giingon bahin sa mga naandang mga tradisyon bahin patay. 

Paghuman sa misa. Niadto na kami sa sementeryo. Sa Bugo Cemetery gilubong si Lola Sitas. Pag-abot didto kay nangadye tapos nag hulog mga bulak dayon sa iya gilubong.

Nangaon mig mirienda didto sa sementeryo apan daghan kaayo ang mirienda. Pag-abot sa balay nilang ante lorna, naniudto na mi.

Bandang alas 3 sa hapon, naghinay hinay na mig pananghid kay pauli na kami. Sa likod gihapon ko sa bonggo nagsakay uban sina Tatay Boy, angkol tining, angkol boy bactol ug ante linda ug ilang anak na si kuya ric ric, ug si angkol daniel. Ginaog namo si tita rosing ug tatay bert sa puerto didto sila manakay ug taxi paingon sa airport. Pag abot sa bukidnon, ginaog namo si kuya gaga ug iyang asawa ug anak kay didto man sila naga puyo.

Ug nagpadayon na ang byahe. Kabila naga bundak ang ulan. Nangabasa na kami. 

Nihunong mi sa Don Carlos para manihapon banda alas 7 sa gab-i kadto.

Pagkahuman nagpadayon na kami sa byahe. Sa byahe didto sa Valencia City nakakita kamig makakuyaw na panan-awon sa kalangitan kay ang mga ibon kay murag bibo kaayo naga lupad lupad daw ginatabunan nila ang langit. 

Pag-abot na namo sa Carmen, nakakita kamig disgrasya sa dapit sa tulay nahulog ang truck sa bangag.

Lami na kaayo matulog, bugnaw kaayo ug mag alas dose na ...

Bandang alas 2 (Hulyo 9) naa nami sa Malungon...

Alas 3 na sa kadlawon  (Hulyo 9) naabot mi sa Alabel. Gihatod namo sina ante linda ug iyang banay sa Baluntay. 

Sa kanto lang mi ninaog ug gipangkapoy ug nangatulog...

******