BAG-ONG BARANGAY HALL SA PAG-ASA, GITURNOVER NA; DEPUTY SPEAKER RUEL PACQUIAO UG MAYOR NONOY SALARDA, GIPANGUNAHAN ANG GROUNDBREAKING CEREMONY SA BAG-ONG GYMNASIUM SA BRGY. PAG-ASA

BAG-ONG BARANGAY HALL SA PAG-ASA, GITURNOVER NA; DEPUTY SPEAKER RUEL PACQUIAO UG MAYOR NONOY SALARDA, GIPANGUNAHAN ANG GROUNDBREAKING CEREMONY SA BAG-ONG GYMNASIUM SA BRGY. PAG-ASA

Drone shot Courtesy: Kap Rose Mae Salway Orlino, dated April 29, 2022

PAG-ASA, Alabel (Abril 29, 2022) – Nagmalampuson ang gipahigayon nga Turnover Ceremony sa bag-ong barangay hall sa Pag-asa, Alabel nga nahimutang sa Sitio Sofan sa nasangpit na barangay, Biyernes sa buntag, Abril 29, 2022. Dungan sa maong aktibidad, gipahigayon usab ang groundbreaking ceremony alang sa pagatukuron nga Barangay Gymnasium (covered court) sa Pag-asa, nga anaa sa kilid sa bag-ong barangay hall.

Photo Courtesy: Alabel Information Office (2022)

Sa mensahe ni Punong Barangay Rose Mae Salway Orlino, nga mapasalamaton gayud siya kauban ang tanang myembro sa konseho sa barangay ug mga lumolupyo sa Pag-asa ngadto sa tanan nga ahensya sa gobyerno nga gituman ang pangandoy nga bag-ong barangay hall sa Pag-asa. Gipasalamatan niya ang makanunayong pagsuporta sa buhatan ni Deputy Speaker Cong. Ruel D. Pacquiao, ingon man ang Provincial Government sa Sarangani nga gipangulohan ni Governor Steve Chiongbian Solon inubanan ni Vice Governor Dr. Elmer T. De Peralta ug tanang myembro sa Sangguniang Panlalawigan, ug wala usab siya malimot sa pagpasalamat sa Lokal nga Panggamhanan sa Alabel ilalom sa liderato ni Mayor Vic Paul “Nonoy” Salarda, MPA ug tanang mga municipal councilor nga migahin gayud sa ilang 100% support sa tanang mga proyekto ug programa sa Barangay Pag-asa.

Photo Courtesy: AIO (2022)

Malaumon matud pa ni Kapitan Orlino, nga pinaagi sa maong mga proyekto sama sa bag-ong barangay hall ug sa pagatukuron nga bag-ong gymnasium makahatag kini og dugang kaayohan ug kalambuan sa ilang barangay. Sumala sa Project Profile nga gi-presentar sa Department of Public Works and Highways (DPWH) Sarangani District Engineering Office (DEO), ang nahuman na nga barangay hall sa Pag-asa aduna’y project name nga “Construction of Multi-Purpose Building, (Government Center) Barangay Pag-asa, Alabel, Sarangani Province,” ug aduna kini Project Description and Scope of Works nga “Construction of (2) Two Storey Building with Water Tank System. Ang maong edipisyo nagkantidad og P 4,924,647. 17, ug gikuha ang pondo niini sa General Appropriations Act (GAA) 2021 – LP - Local Infrastructure. Program (LIP). Ang buhatan ni Congressman Rogelio Pacquiao, ug Senator Emmanuel D Pacquiao, ang mitabang og gahi’g pondo sa maong proyekto.

Sa susama nga pag-presentar, sumala sa DPWH Sarangani DEO, ang Barangay Gymnasium sa Pag-asa, nagkantidad usab og hapit 5 Milyon Pesos ug gikan matud pa ang pondo sa GAA 2022 - Convergence and Special Support Program (CSSP) – Basic Infrastructure Program (BIP). Ang maong gymnasium adunay stage kun entablado ug comfort room (CR). Gikatakda nga matapos ang naasoy nga proyekto sulod 150 calendar days. Dumalag surveying & eng’g services ang contractor sa program ug DPWH Sarangani DEO ang implementing office sa proyekto.

Atul sa turnover ceremony, gitunol sa personahe sa DPWH ang ceremonial key ngadto sa Barangay Pag-asa, simbolo kini nga pormal na nga giturnover sa ahensya ang maong building kanila, mismo si Kapitan Orlino ug si Mayor Salarda ang midawat sa maong susi.

Samtang sa groundbreaking ceremony, gipangunahan ni Alabel Municipal Values Formation officer Rev. Rodolfo Bactol ang pagbendisyun ug human niini, dungan nga ginaog sa mga opisyales sa pagpanguna ni Cong. Ruel, Mayor Nonoy ug mga konsehales ang capsule nga adunay kopya sa plano sa maong gymnasium .

Sa mensahe ni Mayor Salarda, gipasalamatan niya ang katawhan sa Barangay Pag-asa, matud pa niya nga ang kooperasyon sa katawhan hinungdan nganong paspas ang kalambuan sa lungsod. Ang proyekto susama niini, nahimong posible pinaagi sa suporta sa mga national government, provincial government sa Sarangani ug sa buhatan ni Cong. Ruel Pacquiao, ug Senator Emmanuel “Manny” Pacquiao. Hilabihan ang kalipay sa alkalde, tungod sa gipakita nga suporta sa katawhan asa bisan kadtong mga lumolupyo sa lagyong dapit misalmut ug migahin og oras aron musaksi sa mga seremonyas. Gipasalamatan ni Mayor Salarda, ang pamilyang Salway nga mao’y mi-donate sa luna, asa ang mga building gitukod. Ang pagkamaayo sa pamilya sukad pa sa ilang mga katigulangan, dako ang nahatag nga kabag-ohan sa maong barangay, asa pipila sa mga luna nila ang gi-donate sa gobyerno asa karon anaa nahimutang ang Barangay Birthing Home sa Sofan ug ang Sofan Elementary School. Mipaambit usab og mubo nga mensahe ni Congressman Ruel Pacquiao, asa gipasidunggan niya ang kooperasyon sa katawhan ug mapasalamaton kay natapos na gayud ang barangay hall sa Pag-asa. Mahibaloan nga kaniadtong milabayng tuig 2021, personal usab nga gipangunahan ni Cong. Ruel Pacquiao, ang groundbreaking sa maong building dungan sa uban pang infrastructure project sa Alabel. Nanghinaut ang kongresista, nga mapalipdan ug magamit ang maong building. Magsilbi matud pa kini nga nahimutangan sa panaghiusa ug kalinaw sa tibuok Pag-asa ingon man sa entiro munisipyo sa Alabel.

Sa closing message, nalipay pag-ayo ang tribu sumala pa ni Municipal Councilor Lente L. Salway, Jr., tungod sa pagpalangga sa gobyerno sa mga Indigenous People (IP) ug paghatag kanila og importansya hilabi na sa natad sa edukasyon, agrikultura, imprastraktura ug uban pa. Segun usab sa konsehal nga Tribal Chieftain usab sa Brgy. Pag-asa, nga ampingan gayud sa Pag-asa ang maong mga building ingon man ang uban pang mga programa ug proyekto sa gobyerno. Present sa maong okasyon sila Vice Governor Dr. Elmer T De Peralta, inubanan sa mga myembro sa Sangguniang Panlalawigan nga sila Board Members Corazon S. Grafilo, Irish Louie D. Arnado, Joseph M. Calanao, Dr. Jose Tranquilino L. Ruiz, ug Ephraim P. Galzote. Anaa usab uban nila si Gwynn L. Singcoy, nga kanhing opisyales sa Munisipyo sa Malapatan. Kanunay usab ang pagsuporta sa mga myembro sa Sangguniang Bayan sa Alabel asa misalmut sa aktibidad sila Municipal Councilor Lente L. Salway, Jr., Municipal Councilor Tungko P. Sadavao, Municipal Councilor Paul S. Villamora, Municipal Councilor Danilo J. Jabilles, Municipal Councilor Ferdinand Rey O. Flores, Municipal Councilor Narciso S. Grafilo IV, Municipal Councilor Bonifacio M. Pacquiao, Municipal Councilor Hermie C. Galzote, MPA ug Municipal IPMR Manuelo S. Mangalon. Misalmut usab sa okasyon si kanhing Municipal Councilor Joel E. Aton, Municipal Administrator Lilibeth Jabilles Salarda, MPA, Civil Security Unit head Engr. Florence Paul J Salarda, ug mga opisyales gikan sa laing barangay sa Alabel.

Sa katibuk-an nahimong mabungahon ang “historic” nga okasyon, tungod usab sa disiplina sa katawhan, mialalay sa pagmintinar sa peace and order ang kapulisan sa pagpanguna ni PCAPT Argie Miraflores, Deputy Chief of Police sa Alabel Municipal Police Station, mga personahe gikan sa 73IB nga gipanguluhan ni 1LT Stephen Yangzon, commanding officer sa Alpha Company, 73IB Philippine Army, full force usab ang mga Bagani (kamlong banwe) sa Pag-asa ug mga force multiplier sa Barangay Pag-asa. (ALABEL INFORMATION OFFICE)

#SmileAlabel #MasaganangAlabel